„თანამრომლების ხარჯზე არ უნდა ხდებოდეს თანხების დაზოგვა. პირველ რიგში უნდა მოიკითხონ, სად წავიდა ის თანხები და დაპირებები, რომელსაც ყველა ბორდი გასცემდა არჩევნების წინ. მაშინ თითოეულმა მენეჯმენტის წარმომადგენელმა ისევე შეიჩეროს უფლებამოსილება, როგორც შეუჩერდებათ ჟურნალისტებს, გადაცემების ავტორებს და წამყვანებს“. საზოგადოებრივ მაუწყებელზე შესაძლო რეორგანიზაციის პროცესზე, პრეზიდენტის პრესსპიკერმა, ჟურნალისტმა ეკა მიშველაძემ ისაუბრა.
„ბევრ დირექტორს და ბევრ ბორდს მოვსწრებივარ. ყველა მათგანი წუხდა იმაზე, რომ საზოგადოებრივ მაუწყებელს სჭირდება რენოვაცია, განახლება, შენობას სჭირდება რემონტი, გადაცემებს ახალი ტექნიკა და ა.შ. ეს იყო მუდმივი წუხილი და მუდმივად ვსვამდით კითხვებს, თუ როდის მოხდებოდა ეს. ყველაფერ ამაზე დიდი თანხა იყო გამოყოფილი. ეს პროცესი დღეს და გუშინ არ დაწყებულა.გადასახადების გადამხდელების ხარჯზე არსებობს ეს ტელევიზია და რა თქმა უნდა ჩვენი ყველას ინტერესია, რომ ის იყოს კონკურენტუნარიანი, რეიტინგული, ჰქონდეს უფრო საინტერესო გადაცემები. თუმცა, რეფორმა მხოლოდ ერთი ჯგუფის ინტერესების შესაბამისად არ უნდა ტარდებოდეს.
ეს არ არის ხედვა, ეს არის პოლიტიკური გადაწყვეტილება, არ უნდა დარჩეს სივრცე, სადაც ადამიანები სვამენ კითხვებს, სადაც ისმის ხალხის ხმა, ეს არ ხდება შემთხვევით, რომ გადაცემების დახურვა ხდება საარჩევნო წელს. ეს არის მედია ველის მოსუფთავების მცდელობა. ეს არის ტელევიზია, რომელიც პირველ რიგში ხალხის საჭიროებებზე უნდა იყოს მორგებული, მათ პრობლემებს უნდა აშუქებდეს ყველაზე სწრაფად,“–განაცხადა ეკა მიშველაძემ.
მანანა ღოღობერიძე
