„თვითშეზღუდვა გულისხმობს, რომ ყველა ადამიანი, ჟურნალისტი თუ პოლიტიკოსი, ახორციელებს რა აზრის გამოხატვის თავისუფლებას, მხედველობაში უნდა მიიღოს კანონით განსაზღვრული სხვა სიკეთეები“. ამის შესახებ იუსტიციის უმაღლესი საბჭოს წევრმა, მოსამართლე ევა გოცირიძემ ტელეკომპანია „იმედზე“, გადაცემა „ქრონიკის“ ეთერში ისაუბრა.
„მე ვუპასუხე ჟურნალისტური ეთიკის ქარტიის განცხადებას. მათ უცნაური და გაუგებარი უწოდეს იუსტიციის უმაღლესი საბჭოს განცხადებულ დებულებას, რომ ჟურნალისტებს ეკისრებათ თვითშეზღუდვისა და თვითცენზურის ვალდებულება. ქარტიაში აცხადებენ, რომ იზრუნებენ რადგან არა თუ ცენზურა, თვითცენზურაც არ არსებობდეს. თუ ყველანი არ დავექვემდებარებით თვითშეზღუდვას, არ ვიფიქრებთ იმაზე რა ზიანი შეიძლება გამოიწვიოს ჩვენმა ნათქვამმა, ეს ნიშნავს, რომ თავს ვანიჭებთ უფლებას გამოვიყენოთ ყველა ტერმინი.
უნდა დავფიქრდეთ სანამ რამეს ვიტყვით. გვინდოდა გაგვევლო ზღვარი და გვეთქვა ყველასთვის, რომ კრიტიკა დასაშვებია, მაგრამ ზღვარი უნდა გავავლოთ კრიტიკასა და ლანძღვას, კრიტიკასა და მოსამართლეების დაშინებას შორის. ცილისწამების საკითხებში მტკიცების ტვირთი უნდა გადავიდეს მოპასუხეზე. მისი დასამტკიცებელი უნდა გახდეს, რომ ფაქტები რაც გაავრცელა, იყო მართალი“ , – განაცხადა ევა გოცირიძემ.
მანანა ღოღობერიძე