ადგილობრივი თვითმართველობის არჩევნებზე დარეგისტრირებულ კანდიდატთა წინასაარჩევნო კამპანია დიდი ხანია დაიწყო, თუმცა არჩევნები 2017 გადამწყვეტ ფაზაში შედის. ამომრჩეველის ნება 21 ოქტომბერს გაირკვევა. ყველაზე დაძაბული ბრძოლა მერობისთავის დედაქალაქში გაიმართება. თბილისის მერობის კანდიდატთა შანსებს “თბილისი თაიმსთან” ექსპერტი, გია ხუხაშვილი, აფასებს.
სექტემბრის დადგომასთან ერთად წინასაარჩევნო ციებცხელება კიდევ უფრო გააქტიურდა. სულ მალე თვითმართველობის არჩევნები იქნება. თბილისში 5 კანდიდატი (კახა კალაძე, ზაალ უდუმაშვილი, ელენე ხოშტარია, ალეკო ელისაშვილი და ირმა ინაშვილი) იყრის კენჭს. მათ უკვე დიდი ხანია დაიწყეს წინასაარჩევნო კამპანია. როგორ შეაფასებდით თითოეული მათგანის შანსებს? ვის აქვს შანსი გახდეს დედაქალაქის მერი…
– რეალურად სახელისუფლებო კანდიდატს აქვს უპირატესობა, თუმცა მთავარი ინტრიგა იმაში კი არ მდგომარეობს, ვინ მოიგებს არჩევნებს, არამედ მთავარი ინტრიგა ისაა, მეორე ტური შედგება თუ არა, ანუ სახელისუფლებო კანდიდატი გადალახავს თუ არა 50%-იან ბარიერს. ამაშია მთავარი ინტრიგა. თუ მან ეს ვერ მოახერხა, მაშინ შანსი იმისა, რომ მეორე ტური წააგოს, შეიძლება ითქვას, უკვე არსებობს. თვითონ ოპოზიციაში ვინ გავა მეორე ადგილზე, აი, ამაზე ვმსჯელობთ ახლა ჩვენ. მეორე ადგილზე გასვლის თეორიული შანსი აქვს ელისაშვილს. თეორიული შანსი აქვს უდუმაშვილსაც და შესაძლოა სხვებსაც, მაგრამ ეს მხოლოდ თეორიაა. მეორე ადგილზე გასული კანდიდატი გადაწყვეტს მეორე ტურის და, შესაბამისად, თბილისის მერის ბედს. ის, რომ სახელისუფლებო კანდიდატი პირველ ადგილზე გავა პირველივე ტურში, ამაში ეჭვი არ მეპარება. ელისაშვილმა თუ მოახერხა წინასაარჩევნო ეტაპის ნორმალურად გავლა და მეორე ტურში გადაინაცვლა, მას ექნება შანსი, რომ მთელი ოპოზიციური ელექტორატის მიიმხროს და კალაძე დაამარცხოს, თუმცა ეს ძალიან რთული იქნება. საკმაოდ დაბალია ამის ალბათობა. ჩემი აზრით, კალაძე არაა ელისაშვილის პრობლემა. მისი პრობლება ისაა, რომ მასში იბრძვის პოლიტიკოსი და აქტივისტი. ხელისუფლება ყელაფერს გააკეთებს, რომ მოახდინოს მისი პროვოცირება და შეცდომები დააშვებინოს. სამწუხაროდ, ელისაშვული ჯერ არ არის იმდენად დაცული, რომ რაიმე პროვოკაციაზე არ წამოეგოს.
როგორც უკვე ვთქვით, წინასაარჩევნო კამპანია რამდენიმე თვეა მიმდინარეობს. თბილისის მერობის კანდიდატებმა საკუთარი პროგრამა და დაპირებები წარუდგინეს ხალხს. თქვენ როგორ ფიქრობთ, ვინ უფრო კარგად მუშაობს მხარდამჭერთა მოზიდვაზე?
–პროგრამა-დაპირებები ამ არჩევნებზე არაფერს ნიშნავს. ჯერ ერთი რეალურ შინაარს მოკლებულია და, მეორეც, ამომრჩეველი ნაკლებად ენდობა დღეს სიტყვებს, რადგან ძალიან ცუდი გამოცდილება აქვს. დაპირებების განხილვასაც კი არ აქვს აზრი.
ნაციონალურ მოძრაობას ჰყავს თავისი სტაბილური ელექტორატი, მაგრამ მათი პრობლემა არის ის, რომ განვითარების, ანუ ამ ელექტორატის გაზრდის პოტენციალი არ აქვთ. პატრიოტთა ალიანსსაც ჰყავს თავისი ელექტორატი თბილისში. მართალია მწირი, თუმცა მაინც ელექტორატი. თავისუფალი ამომრჩეველი, რომელსაც არ მოსწონს არც დღევანდელი ხელისუფლება და არც წინა, ეს არის უფრო ელისაშვილის ამომრჩეველი, ვიდრე სხვა პარტიების. რამდენად მოახერხებს მათი მხარდაჭერის მოპოვებას, ეს უკვე შემდეგ გაირკვევა.
დამეთანხმებით, დაპირებებთან ერთად უმნიშვნელოვანესია რეკლამა და სლოგანები. ამ მხრივ რომელი კანდიდატი გამოირჩევა? რამდენად განსხვავდება მათი შეთავაზებები ერთმანეთისაგან და რაც მთავარია, რამდენად არის რეალური?
-სლოგანები არის გარკვეული ფორმულები და საკმაოდ უხარისხოა. ზოგიერთ შემთხვევაში კურიოზულ სახესაც კი ატარებს. მაგალითად, კახი კალაძის ინიციატივა ღამის ტურიზმის განვითარებასთან დაკავშირებით. რა არის ღამის ტურიზმი? ღამის ტურიზმი არის პროსტიტუცია, სათამაშო ბიზნესი და ნარკოტიკებით ვაჭრობა. ამის განვითარებაზე თუ ლაპარაკობს, არ ვიცი. ღამის ტურიზმი რას ნიშნავს, თვითონ როგორ ხსნის და როგორ უყურებს. ღამის გართობის ეს სამი კლასიკური ნაირსახეობა არსებობს. თუ ამის განვითარება უნდა, მაინდამაინც კარგი არ უნდა იყოს.
ბატონო გია, საინტერესოა თქვენი ექსპერტული მოსაზრებით, ვის ვიხილავთ თბილისის მომავალი მერის ამპლუაში? რომელი კანდიდატი შეძლებს მიზნის მიღწევას და რა კრიტერიუმით აირჩევს მას ხალხი?
– მომავალი მერის ამპლუაში ყოფნის ყველაზე დიდი შანსი კალაძეს აქვს. თეორიულად მაღალი შანსი აქვს ელისაშვილსაც, კალაძის შემდეგ, რა თქმა უნდა, მაგრამ მისი მდგომარეობა ძალიან მყიფეა. ის არ არის სტაბილური კანდიდატი. მისი რეიტინგი შეიძლება უცბად ავარდეს ზემოთ ან საერთოდ დაეცეს. სტაბილურობა აკლია. მის შემდეგ უდუმაშვილს და ყველა დანარჩენს.
მაგდა ბატიაშვილი
