„მედიას მთელ მსოფლიოში მძიმე პერიოდი აქვს, სოციალური მედიის, საკაბელო ტელევიზიის, კომუნიკაციების გამო. ამან წაიღო გარკვეული „ნამცხვრის“ ნაწილი სარეკლამო ბაზრიდან“ , – სატელევიზიო პროდუქტის შინაარსსა და მაყურებლის მოთხოვნაზე „ბრავო რეკორდსის“ დამფუძნებელმა „ტვ პირველზე“, გადაცემა „პირველების“ ეთერში ისაუბრა.
„ის რეალობა, რომელიც ტელევიზიაშია სხვა საქართველოა. ეთერი არის ზედმეტად პოლიტიზირებული. მოგებული დარჩება ის არხი,რომელიც დაიწყებს ისეთი სიუჟეტების გაკეთებას,რომელიც ეხება ადამიანის ყოველდღიურობას, ფასებს, ინფრასტრუქტურას, ტრანსპორტს. ადამიანების პრობლემებს არ ესადაგება სატელევიზიო პრობლემა, სერიოზული აცდენაა ინტერესებს შორის.
ტელევიზიაში რეიტინგი არის ინერტული ცნება. ნებისმიერ ტელევიზიას აქვს სამი მიზანი, ეს არის შემეცნება, ინფორმირება, გართობა. აქედან შემეცნება უფრო მეტად არის საზოგადოებრივი არხის საქმე.ტელევიზია არის ბიზნესი, ისევე როგორც მშენებლობა. ამ ბიზნესს დღეს მართავენ არაპროფესიონალები. პირველ რიგში საჭიროა სწორი მენეჯმენტი.
საქართველოში როდესაც პირველი დამოუკიდებელი მედია „იბერვიზია“ გაჩნდა, არც სატელიტური მედია იყო, არც სმარტფონები და ინტერნეტი. სრულიად ახალი სახეები ამბობდნენ სიმართლეს მედლის მეორე მხარეს. ჩვენ უნდა გავქცეოდით წნეხს პოლიტიკოსების მხრიდან“ , – განაცხადა ზაზა შენგელიამ.
