თბილისის მასშტაბით, შემთხვევითი შერჩევის გზით, 400 ზრდასრულ მოსახლეს შორის ორგანიზაცია ACT GLOBAL-მა კვლევაა ჩაატარა. კვლევა შემდეგ საკითხს შეეხებოდა-რამდენად ხშირად სტუმრობენ თბილისის მცხოვრებლები კვების სხვადასხვა ტიპის ობიექტს და რა სიხშირით იძახებენ საკვებს.
შედეგების მიხედვით ირკვევა, რომ ბოლო 6 თვის განმავლობაში თბილისელების მხოლოდ 17%-ს უსარგებლია კვების გამოძახების სერვისით. როგორც კვლევა აჩვენებს, თბილისელი კაცების უფრო დიდი ნაწილი იძახებს საკვებს (23%), ვიდრე ქალები (13%). ასევე, აღსანიშნავია რომ, საკვების გამოძახების სერვისით უფრო მეტად 18-30 წლის ახალგაზრდები სარგებლობენ (41%), ხოლო უფრო მაღალი ასაკის წარმომადგენლებში ამ სერვისით მოსარგებლეთა წილი იკლებს.
კვლევამ აჩვენა, რომ რესტორნებში სიარულის ქცევა თბილისში საკმაოდ გავრცელებულია – ათიდან შვიდი თბილისელი გარკვეული პერიოდულობით დადის რესტორანში (70%). მათ შორის, თბილისელების ერთი მესამედი (33%) რესტორნებს სულ მცირე თვეში ერთხელ სტუმრობს.
აღსანიშნავია, რომ თბილისელი კაცების თითქმის ნახევარი რესტორანს სულ მცირე თვეში ერთხელ სტუმრობს (45%), მაშინ როდესაც ამ სიხშირით რესტორანში თბილისელი ქალბატონების მხოლოდ ერთ მეოთხედ (25%) დადის.
ნინო ზარიძე
