26 ოქტომბერს 10:00 საათზე სასტუმროში თბილისი მარიოტი საზეიმოდ გაიხსნება XXII საერთაშორისო სამეცნიერო კონგრესი “ოლიმპიური სპორტი და სპორტი ყველასათვის“. მონაწილეებს მიესალმებიან საქართველოს განათლების, მეცნიერების, კულტურისა და სპორტის მინისტრის მოადგილე შალვა გოგოლაძე, საქართველოს ფიზიკური აღზრდისა და სპორტის სახელმწიფო სასწავლო უნივერსიტეტის რექტორი, პროფესორი ჯემალ ძაგანია, ფიზიკური აღზრდისა და სპორტის უნივერსიტეტების საერთაშორისო ასოციაციის პრეზიდენტი კაირატ ზაკირიანოვი და საუნივერსიტეტო სპორტის საერთაშორისო ფედერაციის პრეზიდენტი ოლეგ მატიცინი.
27 ოქტომბერს 10:00 საათზე ეროვნულ ოლიმპიურ კომიტეტში გაიმართება ფიზიკური კულტურისა და სპორტის უნივერსიტეტების საერთაშორისო ასოციაციის აღმასრულებელი კომიტეტის სხდომა;
28 ოქტომბერს 10:00 საათზე სასტუმროში თბილისი მარიოტი გაიმართება პლენარული სხდომა, კონგრესის შეჯამება, საპატიო დოქტორის წოდების მინიჭებისა და უნივერსიტეტების საპატიო ნიშნებით დაჯილდოების ცერემონია.
25-28 ოქტომბერს თბილისში საქართველოს ფიზიკური აღზრდისა და სპორტის სახელმწიფო სასწავლო უნივერსიტეტის ეგიდით იმართება XXII საერთაშორისო სამეცნიერო კონგრესი: “ოლიმპიური სპორტი და სპორტი ყველასათვის“. კონგრესი მსოფლიოს სხვადასხვა ქვეყანაში ყოველწლიურად ტარდება ფიზიკური აღზრდისა და სპორტის წამყვანი სახელმწიფო უნვიერსიტეტების ეგიდით და ტარდება საერთაშორისო ოლიმპიური კომიტეტის პატრონაჟით. XXII საერთაშორისო სამეცნიერო კონგრესი ეძღვნება საქართველოს ფიზიკური აღზრდისა და სპორტის სახელმწიფო სასწავლო უნივერსიტეტის დაარსებიდან 80 წლის იუბილეს. კონგრესის საპატიო სტუმრები იქნებიან მსოფლიოს წამყვანი სპორტის უნივერსიტეტების რექტორები, პროფესორები, სპორტის დამსახურებული მოღვაწეები და სპორტის სფეროს წარმომადგენლები მსოფლიოს 20 ზე მეტი ქვეყნიდან.
