ვენეციის 58-ე ხელოვნების საერთაშორისო ბიენალზე ქართულ ეროვნულ პავილიონს პროექტი “REARMIRRORVIEW Simulation is Simulation, is Simulation, is Simulation…“ წარადგენს.
ამ თემასთან დაკავშირებით 22 ნოემბერს, საქართველოს განათლების, მეცნიერების, კულტურისა და სპორტის სამინისტროში პრესკონფერენცია გაიმართა. ღონისძიებას მინისტრის მოადგილე ლევან ხარატიშვილი, სსიპ „შემოქმედებითი საქართველოს“ დირექტორი ანა რიაბოშენკო და გალერეა Project ArtBeat-ის თანადამფუძნებელი ნათია ბუკია უძღვებოდნენ.
კონკურსი ვენეციის ხელოვნების 58-ე საერთაშორისო გამოფენაზე საქართველოს სახელით წარსადგენ პროექტზე, საქართველოს განათლების, მეცნიერების, კულტურისა და სპორტის სამინისტრომ და სსიპ „შემოქმედებითმა საქართველომ“, 12 სექტემბერს გამოაცხადეს. გამარჯვებული წამყვანი ქართველი და უცხოელი ექსპერტებისაგან შემდგარმა საკონკურსო კომისიამ, შემოსული 10 ნამუშევრიდან შეარჩია.
გამარჯვებულ პროექტზე იმუშავეს მხატვარმა ანნა ეძგვერაძემ (ანნა კ.ე.) და კურატორმა მარგო ნორტონმა. პროექტს ვენეციის ბიენალეზე გალერეა სიმონე სუბალი და პროჯექთ ართბითი წარადგენს.
2019 წლის ვენეციის ბიენალე 11 მაისს გაიხსნება და 24 ნოემბრამდე გასტანს. საქართველოს ეროვნული პავილიონისათვის 74 კვ. მ ფართობის სივრცე ვენეციის ერთ-ერთ მთავარ საგამოფენო სივრცეში – „არსენალეზეა“ გამოყოფილი. თანხა გამარჯვებული პროექტისათვის შეადგენს 160 000 ლარს.
წლევანდელი გამოფენა (კურატორი – რალფ რუგოფი), იმართება საერთო კონცეფციის ქვეშ – „გეცხოვროთ საინტერესო დროს” (May You Live in Interesting Times).
კონცეფცია ხელოვანთა იმ ნამუშევრებს გააერთიანებს, რომლებიც დამთვალიერებელს ობიექტებისა და გამოსახულებების, ჟესტებისა და სიტუაციების ახლებური გააზრების საშუალებას მისცემს.
