განათლების რეფორმის ფარგლებში სკოლებში „ახალი სკოლის მოდელი“ დაინერგება, რომელიც გულისმობს ისეთი საგანმანათლებლო გარემოს ჩამოყალიბებას, რომელიც მოსწავლეებს საკუთარი პოტენციალის რეალიზების საშუალებას და თანამედროვე ტექნოლოგიების ეპოქაშუ მათ საჭირო ცოდნითა და უნარებით შეაიარაღების შესაძლებლობას მისცემს.
საქართველოს განათლების, მეცნიერების, კულტურისა და სპორტის მინისტრმა მიხეილ ბატიაშვილმა, რომელმაც დღეს საზოგადოებას ინოვაციებისა და ტექნოლოგიების მიმართულებით დაგეგმილი პროექტების პრეზენტაცია წარუდგინა, დეტალურად ისაუბრა იმ სიახლეებზე, რომელიც სკოლებში ტექნოლოგიების დანერგვას გულისმობს.
„ახალი სკოლის მოდელი გულისხმობს ტექნოლოგიების და ინოვაციების შეტანას სწავლების პროცესში. ჩვენ გვყვავს უნიჭიერესი მოსწავლეები, რომლებიც სრულ მზადყოფნაში არიან სასწავლო პროცესში ტექნოლოგიები, როგორც დამხმარე ინსტრუმენტები მიიღონ. ზოგადსაგანმანათლებლო დაწესებულებებში საინფორმაციო ტექნოლოგიების შეტანა მნიშვნელოვანი ეტაპია, იმისათვის, რომ ბავშვები რაც შეიძლება ადრეული ასაკიდან ჩაერთონ პროგრამირებისა და ტექნოლოგიების ნაწილში, ტექნოლოგიები და ინოვაციები, მათი განვითარებისთვის უმნიშვნელოვანესია . ჩვენ მაქსიმალურად დავეხმარებით პედაგოგებსაც, რომ თანამედროვე ტექნოოგიები მათთვის ადვილად გამოსაყენებელი იყოს“ — აღნიშნა მიხეილ ბატიაშვილმა.
რეფორმის ფარგლებში, ინოვაციური მიდგომები და ტექნოლოგიები პედაგოგისთვის და მოსწავლისთვის იქნება დამხმარე საშუალება უნარების განსავითარებლად. სასწავლო პროცესში ციფრული ინსტრუმენტების გამოყენება მოხდება ცოდნის შეძენის, ინფორმაციის შენახვისა და გაცვლის მიზნით.
