შეიძლება ითქვას, საკუთარი საყვარელი საქმიანობის პოვნას სხვადასხვა ადამიანის შემთხვევაში სხვადასხვა დრო სჭირდება. არაერთი ეტაპის გავლის შემდგომ, ჩვენ ვპოულობთ მოცემულობას, რომელშიც თავს განსაკუთრებულად კარგად ვგრძნობთ. ეკატერინე ჯოლოგუამ საკუთარი ჯადოსნური სამყარო ფერებში აღმოაჩინა. დღეს მას საკუთარი გარემო აქვს, რომელიც, მისივე თქმით, ბედნიერს ხდის. ეკატერინე „თბილისი თაიმსს“ ესაუბრა.
ძალიან საინტერესო ნამუშევრები გაქვთ – დეტალურად, რას ამზადებთ?
,,ეკო ხელნაკეთი’’ არის სახელოსნო, რომელიც ჩამოვაყალიბე 2015 წელს, არ არის კონკრეტულად მხოლოდ ერთ მიმართულებაზე ორიენტირებული. სხვადასხვა დროს განსხვავებული ხელსაქმე მიზიდავდა. დავიწყე თექაზე მუაობით. ვამზადებდი თექის ფეხსაცმელებს, დიდი ფორმატის პანოებს, აქსესუარებს. პარალელურად, ვეუფლებოდი ისეთ საინტერესო მიმართულებებს, როგორიცაა ქარგვა, გალვანოპლასტიკა, ნკაუსტიკა. შემდეგ კი ამ მიმარტულებებს ერთი პროდუქტზე მუშაობისას ვაერთიანებდი.
ძიების პროცესი თან ახლავს წინსვლას. 2017 წლიდან გულით, გონებით სრულად გადავეშვი ისეთ საინტერესო საქმიანობაში, როგორიცაა სკრაპბუკინგი.
ვაწარმოებ პერსონალურ ფოტოალბომებს, პირადი ჩანაწერების წიგნებს, აქსესუარებს პატარებისა და მათი დედიკოებისათვის. ეს საქმიანობა ნაკლებად პოპულარულია ჩვენს ქვეყანაში. ვცდილობ, ჩემი წვლილი შევიტანო მის პოპულარიზაციაში. ამ მიზნით, „ტიკტოკ“ გვერდიც კი გავაკეთე (eco handmade), სადაც ვდებ მუშა პროცესის ვიდეოებს, ვპასუხობ ხელსაქმით დაინტერესებული ახალგაზრდების კითხვებს. ძალიან ბევრი ნიჭიერი ადამიანია საქართველოში და მე არასდროს მეზარება ცოდნის გაზიარება.
ნამუშევრებს რისგან ქმნით?
,,ეკო ხელნაკეთი“-ს მთავარი იდეა ეკოლოგიურად სუფთა ნედლეულზე მუშაობაა. ძირითადად, საბავშვო პროდუქციას ვამზადებთ, ამიტომ, ეს საკითხი განსაკუთრებულად აქტუალურია. ეკო მეგობრული ტექტილი, მუყაო ტოქსიკური დანამატების გარეშე, წყლის ბაზაზე დამზადებული ეკოლოგიურად სუფთა საღებავები. მინიმუმამდე დავიყვანეთ წებოს გამოყენება ჩვენს ალბომებში, უმეტესწილად, ყველაფერი გაკერილია. ეს ზრდის პროდუქტის დამზადების დროს, თუმცა, ჩვენს პატარა სახელოსნოს მაქსიმალურად აახლოებს მთავარ სლოგანს: ,,მხოლოდ ეკოლოგიურად სუფთა პორდუქტები პატარებს“.
ნამუშევრებს შეკვეთით ამზადებთ თუ საკუთარი გემოვნებით?
სიმართლე გითხრათ, პირადი შემოქმედებისთვის თითქმის არ მრჩება დრო, რადგან უმეტესწილად შეკვეთით მზადდება ეს დიზაინერული, პერსონალური ფოტოალბომები. დამკვეთი გვიკავშირდება „ინსტაგრამზე“, ფბ-ზე ან პირად ნომერზე, გვიზიარებს თავის ჩანაფიქრს ან ირჩევს უკვე წარმოდგენილი ნამუშევრებიდან, ჩვენ ვეხმარებით პროდუქტის საბოლოო ვერსიის ჩამოყალიბებაში, ვქმნით პერსონალურ დეკორს, ვანაცვლებთ დეტალებს, ვუთანხმებთ საბოლოო ესკიზს და ვიწყებთ მუშაობას.
ზუსტად ორი ერთნაირი ნივთი არასდროს გამოდის, ამდენად, თითოეული ნიმუში ექსკლუზიურია. დასრულებული ნიმუშის ფოტოები დამკვეთს ეგზავნება წინასწარ, ხოლო ნივთი გაგზავნიდან ერთ სამუშაო დღეში უკვე მასთან, სახლშია.
თქვენი შეფასებით, რით გამოირჩევა თქვენ მიერ შექმნილი პროდუქცია სხვებისგან?
როცა მცირე დროში ხარისხიანი პროდუქციის დამზადებაზეა საუბარი, თან რაოდენობაში, მხოლოდ ხელებით ვერაფერს გავხდებით. საქმეში აუცილებად ერთვება მძიმე არტილერია.
მუშა პროცესში დიდ ყურადღებას ინოვაციურ მიდგომებს ვუთმობ. ერთი ალბომის შექმნაზე ზუსტად 3 ადამიანი და 6 ინოვაციური დანადგარი მუშაობს, როგორიცაა საქარგავი და საკერავი მანქანა, პლოტერი, ლაზერული ჭრისა და გრავირების დანადგარი, მექანიკური ქაღალდის საჭრელი, 2 გრაფიკული რედაქტორი.
ნებისმიერ ხელოვანს თავისი ხელწერა აქვს, ამდენად, ჩემი ალბომები და ნებისმიერი სხვა ხელსაქმის მიმართულება, რაზეც ვმუშაობს, ატარებს ჩემს ინდივიდუალიზმს. სულს და გულს ვდებ ხელსაქმეში და უფალს ვმადლობ, რომ საყვარელი საქმე მაპოვნინა. ეს დიდი ბედნიერებაა.
თუ გეგმავთ, სხვა ტიპის ნამუშევრებიც დაამზადოთ?
მუდმივად ძიების პროცესში ვარ. უმეტესწილად, ისეთი მიმართულებები მაინტერესებს, რაც ჩვენი ქვეყნისთვის უცხოა, ან ნაკლებ პოპულარული. თუმცა, ხელსაქმის პარალელურად, ჩემი ძალიან დიდი სურვილია ისეთი სივრცის შექმნა, სადაც შევძლებ – ცოდნა და გამოცდილება გავუზიარო დაინტერესებულ ადამიანებს. სწორედ ამ მიზნით, დიდი ფართი ვიქირავე ჩემს მშობლიურ ქალაქში, ზუგდიდში და ძალიან მალე ჩავუშვებთ სახელოსნოს ბაზაზე ხელსაქმის კურსებს ბავშვებისათვის. ბედნიერი ვიქნები, თუ შევძლებ – აღმოვაჩენინო პატარებს უსაზღვრო შესაძლებლობები და უნარები, რადგან, როგორც საქართველოს პატრიარქმა თქვა, თითოეულ ადამიანში იმალება ნიჭი, რომელსაც გაღვიძება, ხელშეწყობა და წახალისება სჭირდება.
ბედნიერი მას შემდეგ ვარ, რაც ხელსაქმის ფერადი სამყარო აღმოვაჩინე. სიმართლე გითხრათ, ეს არის ის, რის გარეშეც წარმოუდგენელი იქნებოდა ჩემი ყოველდღიურობა.
