არცთუ ისე დიდი ხნის წინ საქართველოს ეროვნული ბიბლიოთეკის კიდევ ერთი გეგმის შესახებ გახდა ცნობილი. მრავალი სიახლის კვალდაკვალ, სულ მალე ემიგრაციის მუზეუმი გაიხსენა. აღნიშულ საკითხს საზოგადოებისგან დიდი და პოზიტიური გამოხმაურება მოჰყვა. დეტალებზე „თბილისი თაიმსს“ საქართველოს პარლამენტის ეროვნული ბიბლიოთეკის გენერალური დირექტორი, გიორგი კეკელიძე ესაუბრა.
როდისთვის იგეგმება ემიგრაციისმუზეუმის გახსნა?
ვფიქრობთ, რომ, სავარაუდოდ, აღნიშნული მუზეუმი უკვე ერთ თვეში გაიხსნება.
ემიგრაციის მუზეუმი შეგვიძლია, ორ ნაწილად განვიხილოთ. პირველი არის ის დარბაზი, რომელიც ჩვენ, დაახლოებით, ოთხი წლის წინ გავხსენით და რომელშიც ძალიან ბევრი მასალა არის მოთავსებული – ისინი ჩამოტანილი გვაქვს სხვადასხვა ქვეყნიდან, მათ შორის ამერიკიდან, საფრანგეთიდან, გერმანიიდან, თურქეთიდან, უკრაინიდან და ა.შ.
მეორე გახლავთ ემიგრაციის ის მუზეუმი, რომელიც რამდენიმე დღეა, რაც ჩვენ გადმოგვეცა. მისი სამართალმემკვიდრე იყო რუსუდან შარაძე და ის გახლავთ გურამ შარაძის მიერ დაფუძნებული მუზეუმი თბილისის სახელმწიფო უნივერსიტეტში. სწორედ ამ მუზეუმის გადმოცემის შემდეგ გადავწყვიტეთ, რომ ეს სივრცეები გაგვეერთიანებინა და შეგვექმნა ემიგრაციის ერთი დიდი მუზეუმი – ემიგრაციული მასალების ცენტრი, რომელიც, ამ შემთხვევაში, უკვე ეროვნულ ბიბლიოთეკაში დაიდებს ბინას.
რა მასალები იქნება წარმოდგენილი სივრცეში?
რეალურად, წარმოდგენილი იქნება ფრანგული ემიგრაციის მთელი მასალა – ლევინის მასალები, კერძო კოლექციები (მათ შორის, ამერიკული კოლექციები) და ა.შ. აქ განთავსდება ძალიან მოცულობითი მასალები, რომლებიც საკმაოდ ბევრ რაღაცას გულისხმობს.
გარდა ამ სიახლისა, რას გეგმავთ უახლოეს მომავალში?
სანამ ემიგრაციის მუზეუმი გაიხსნება, ჩვენ შემოგთავაზებთ განახლებულ საკონფერენციო დარბაზს, რომელიც აღჭურვილი იქნება თანამედროვე ტექნიკით და მას ეწოდება ქართული დროშის სახელი იმიტომ, რომ სწორედ ამ დარბაზში მიიღეს თავის დროზე გადაწყვეტილება დროშის ცვლილებასა და ახალი დროშის დიზაინთან დაკავშირებით.
ავტორი:მარიამ ტიელიძე
