რა იციან ჩვენს ქვეყანაში ადამიანებმა საკუთარი ფინანსური მდგომარეობის მართვის მხრივ და როგორ უნდა მოიქცნენ ისინი, რომ არ დაზარალდნენ – აღნიშნული საკითხი თითოეული მოქალაქის ყოველდღიურობას ეხება. არის დეტალები, რაც ჩვენ არ ვიცით, არცოდნა კი პრობლემებს ქმნის.
უფრო დეტალურად, აღნიშნულ საკითხზე „თბილისი თაიმსს“ საბანკო პროდუქტების ექსპერტი, დავით კიკვიძე ესაუბრა.
როგორც ის აღნიშნავს, ზოგადად, განათლების დონე ჩვენს ქვეყანაში არცთუ ისე მაღალია და განათლების სისტემის დასახვეწად გაცილებით მეტი რეფორმაა საჭირო.
„ფინანსური განათლების დაბალი დონე, გარკვეულწილად, უკავშირდება ქვეყნის ფინანსურ სტაბილურობას. აქედან გამომდინარე, ფინანსური განათლების დაბალი დონე ეკონომიკურ სუბიქტებს არასწორი ნაბიჯების გადადგმისკენ უბიძგებს, რაც, საბოლოოდ, არასწორ მოლოდინებს ქმნის.
ფინანსური განათლების მიმართულებით სერიოზული ნაბიჯებია გადასადგმელი“, – განმარტავს კიკვიძე.
ექსპერტი შეკითხვას, თუ ვის მიერ უნდა გადაიდგას აღნიშნული ნაბიჯები, შემდეგნაირად პასუხობს.
„რა თქმა უნდა, ძალიან მნიშვნელოვანია ეროვნული ბანკის როლი. თუმცა, ამას ის დამოუკიდებლას ვერ შეძლებს. მას შეუძლია გარკვეული ღონისძიებების გატარება – იგივე, კამპანიების სახით – მიუხედავად იმისა, რომ ეს არ არის მისი პირდაპირი პრეროგატივა“.
„ლოგიკურია, რომ ამ კუთხით უნდა იზრუნოს განათლების სამინისტრომ, რათა ფინანსური განათლების ელემენტები უკვე სკოლის ასაკიდანვე ისწავლებოდეს. სასურველი იქნება, აღნიშნული ისწავლებოდეს უმაღლეს სასწავლო დაწესებულებებში იმ ფაკულტეტებზე, რომლებიც თავის თავში არ მოიცავს ფინანსურ და ეკონომიკურ საკითხებს“, – ამბობს დავით კიკვიძე.
კიკვიძე ამ მხრივ ზრდასრული ადამიანების ინფორმირების აუცილებლობაზე საუბრობს.
„მათ ხშირად უჭირთ გადაწყვეტილებების მიღება საკუთარ ფინანსურ მდგომარეობაზე. აქ უკვე ეროვნული ბანკი ავრცელებს გარკვეულ, შესაბამის ინფორმაციებს. თუმცა, ეს არ არის საკმარისი და საჭიროა სამინისტროს მიერ კამპანიებისა და ღონისძიებების გატარება – მარტივი და გასაგები ენით“, – აღნიშნავს რესპონდენტი.
კიკვიძე ყურადღებას ფინანსური სექტორის ჩართულობასა და მის უმნიშვნელოვანეს როლზეც ამახვილებს.
„მნიშვნელოვანია ასევე საბანკო სექტორისა და ფინანსური ინსტიტუტების ჩართულობა მაღალ დონეზე. ფინანსურ სექტორში გარკვეული სტანდარტები უნდა დაიგეგმოს ფინანსური განათლების მიმართულებით.
ეროვნულ ბანკს აქვს შემუშავებული გარკვეული დებულებები მომხმარებლებთან მიმართულებით – იგულისხმება ხელშეკრულებების დეტალურად გაცნობა. ბანკები ვალდებულები არიან, დეტალურად გააცნონ მომხმარებლებს ხელშეკრულებები. თუმცა, თვითონ ადამიანებიხლც არ ამახვილებენ ყურადღებას ამ მნიშვნელოვან დეტალებზე. ამ მხრივ, ასეთივეა დამოკიდებულება საბანკო სექტორის მხრიდანაც“, – განაცხადა დავით კიკვიძემ „თბილისი თაიმსთან“ საუბრისას.
მასალა მოამზადა : მარიამ ტიელიძემ
