გასულ კვირას ცნობილი გახდა, რომ მთავრობამ 2021 წლის ეკონომიკური ზრდის პროგნოზი შეცვალა. ამის შესახებ პრემიერ-მინისტრმა ირაკლი ღარიბაშვილმა მთავრობის სხდომაზეც ისაუბრა. მისი თქმით, აქამდე პროგნოზირებული 9.5%-იანი ზრდის ნაცვლად, ზრდის მაჩვენებელი 10% იქნება, რის შედეგადაც მშპ-ის ზომა ნომინალურ გამოხატულებაში 58.7 მილიარდ ლარს მიაღწევს.
“9 თვის რეალურმა ეკონომიკურმა ზრდამ შეადგინა 11.3%, გადაიხედა ეკონომიკური ზრდის პროგნოზიც და ჩვენი ვარაუდით წელს გვექნება ორნიშნა ეკონომიკური ზრდა. მშპ-ის ზრდიდან გამომდინარე, გაიზარდა ნომინალური მთლიანი შიდა პროდუქტის პროგნოზიც. ბიუჯეტის პირველად ვერსიაში პროგნოზირებული 58.4 მილიარდი ლარის ნაცვლად, გადამუშავებულ ვერსიაში პროგნოზირებულია 58.7 მილიარდი ლარი.
2022 წელს რეალური ეკონომიკური ზრდის პროგნოზი შეადგენს 6%-ს და ნომინალური მშპ-ის მოცულობა 65 მილიარდი ლარი იქნება”, – აცხადებს პრემიერი.
2021 წელს არსებული მაღალი ეკონომიკური ზრდის მთავარი განმაპირობებელი ფაქტორი “საბაზო ეფექტია”. საქმე ის არის, რომ ეკონომიკური ზრდის მაჩვენებლები 2020 წლის ანალოგიური პერიოდის მონაცემებს დარდება, აღნიშნულ პერიოდში კი საქართველოში პანდემიით და “ლოქდაუნებით” გამოწვეული ეკონომიკური კრიზისი იყო. კერძოდ, 2020 წლის 9 თვეში საქართველოში ზრდის ნაცვლად 5%-იანი რეცესია იყო.
შესაბამისად, თუკი 2021 წლის რეალურ ეკონომიკურ ზრდას პანდემიამდელი პერიოდის მაჩვენებელს შევადარებთ, დავინახავთ, რომ რეალური ზრდა 2019 წელთან მიმართებით მხოლოდ 6.3%-ია და 2021 წლის ზრდა სინამდვილეში 2020 წლის პანდემიური ჩავარდნით არის მომატებული.