ჯანდაცვის სამინისტროს ინფორმაციით, მიუსაფართა თავშესაფრის მობინადრეთა უმეტესობას დასაქმების სურვილი არ აქვს. როგორც უწყებაში განმარტავენ, 50 ბენეფიციარიდან დასაქმების სურვილი 15-მა გამოთქვა, საიდანაც 3 უკვე დასაქმდა.
რაც შეეხება უშუალოდ მიუსაფართა თავშესაფარში განხორციელებულ ღონისძიებებს, სამინისტროს ინფორმაციით, ყოველდღიურად – დილით და საღამოს ხდება ბენეფიციართა აღრიცხვა. მობინადრეებს აქვთ ორჯერადი კვება, საჭმელი კი გაიცემა ერთჯერადი ჭურჭლით.
“ამასთან, დღეში ერთხელ ხდება ფინანსთა სამინისტროს და ფიზიკური პირების მიერ შემოწირული ტანსაცმელის განაწილება, ისეთი ნივთები კი, რომლის შემოწირულობაც არ ხდება, მაგალითად, წინდების, თავად “კათარზისის” უზრუნველყოფით ურიგდებათ”, – განმარტავენ სამინისტროში.
სანიტარული მდგომარეობის თვალსაზრისით კი, უწყებაში ამბობენ, რომ დღის განმავლობაში, ყოველ 15 წუთში ერთხელ ხდება საპირფარეშოების დეზინფექცია და დასუფთავება.
“რაც შეეხება აბანოს, დამყარდა ურთიერთობა დროებითი თავშესაფრის ახლოს მდებარე აბანოსთან, რომლითაც ამ დროისთვის ისარგებლა 150-მა ბენეფიციარმა. ასევე მოწყობილია აბანო ადგილზეც, რომლითაც სარგებლობენ შეზღუდული შესაძლებლობის მქონე პირები. გარდა ამისა, მოწყობილია მედპუნქტი და დღე-ღამის განმავლობაში მორიგეობს ექიმი”, – აცხადებენ ჯანდაცვის სამინისტროში.
აღსანიშნავია ისიც, რომ ტერიტორია შემოღობილია, გაკეთდა შლაგბაუმი, ასევე კონტროლდება ალკოჰოლური სასმელების შეტანა.
თავშესაფარში დღეის მდგომარეობით, 177 მობინადრე იმყოფებოდა.
14.01.14