“აფბა” 2015 წლის პირველი კვარტლის ეკონომიკის შედეგებს აჯამებს. ახალგაზრდა ფინანსისტთა და ბიზნესმენთა ასოციაცია – “აფბა” კვლევას აქვეყნებს, სადაც ასახულია 2015 წლის პირველ კვარტალში ქვეყნის ეკონომიკაში განვითარებული ძირითადი ტენდენციები, საგარეო ფაქტორები და მათი გავლენის შეფასება საქართველოს ეკონომიკაზე, ასევე ეკონომიკის ცალკეულ სექტორებში არსებული სტატისტიკური მონაცემები და მათი ანალიზი. კვლევის პრეზენტაციაზე “აფბას” ვიცე პრეზიდენტმა შოთა გულბანმა ისაუბრა ეკონომიკის თითოეული სექტორის შესახებ 2015 წლის პირველი კვარტლის მდგომარეობით. “კვლევა იწყება საბანკო სექტორის შეფასებით. ეკონომიკის ეს სფერო სავალუტო პრობლემების ფონზე წარმატებით ფუნქციონირებს, კერძოდ, მიმდინარე წლის პირველ კვარტალში 30%-ით არის გაზრდილი სექტორის მიერ მოზიდული დეპოზიტები და 13.5 მილიარდ ლარს გადააჭარბა. 37%-იანი ზრდა ფიქსირდება სესხების კუთხით. 2015 წლის პირველი კვარტლის მდგომარეობით, კომერციული ბანკების მიერ ეკონომიკაზე გაცემული სესხების მოცულობამ 14.7 მილიარდი ლარი შეადგინა, თუმცა აღსანიშნავია, რომ როგორც დეპოზიტების, ისე სესხების მიმართულებით, ზრდის მაღალი ტემპი ეროვნული ვალუტის დევალვაციამ გამოიწვია. მოგეხსენებათ, სესხების და დეპოზიტების დოლარიზაციის დონე 60%-ს აჭარბებს, შედეგად ლარში გამოსახული მათი მოცულობები საგრძნობლად გაიზარდა. 2015 წლის იანვარ-მარტში ბანკების წმინდა მოგებამ 101 მილიონი ლარი შეადგინა, რაც გასული წლის იგივე პერიოდის მაჩვენებელს 7 მილიონი ლარით, ანუ 7%-ით აღემატება”, – განაცხადა გულბანმა. მისივე თქმით, შემდეგი სექტორი გახლავთ ტურიზმი. ეს სფერო საქართველოს ეკონომიკაში სულ უფრო მნიშვნელოვან ადგილს იკავებს. იგი ერთ-ერთი დარგია, რომელიც ქვეყანას საკმაოდ დიდი სავალუტო ნაკადებით უზრუნველყოფს. “2015 წლის იანვარ-აპრილში შინაგან საქმეთა სამინისტროს მონაცემებით, საქართველოში 1 381 000 ვიზიტორი შემოვიდა, რაც გასული წლის იმავე პერიოდის მაჩვენებელს 2%-ით ჩამოუვარდება. ვიზიტორების 35% ტურისტებზე მოდის. ტურისტული ნაკადების შემცირება გასული წლის ბოლოდან დაიწყო, თუმცა აღსანიშნავია, რომ ბოლო თვეებში კლების ტემპი მცირდება. კერძოდ, იანვარში ვიზიტორების 3%-იანი კლება დაფიქსირდა, თებერვალში – მინუს 2%, ასევე მარტშიც -2%, ხოლო აპრილში ვიზიტორების რაოდენობა არ შემცირებულა, მაგრამ არც გაზრდილა. ტურისტული ნაკადების კლების რამდენიმე ვერსია არსებობს. ყველაზე ხშირად სავიზო რეგულაციების გამკაცრებაზე მიდის საუბარი, მაგრამ ანალიზი და ფაქტობრივი გარემოებები ცხადყოფს, რომ აღნიშნული ფაქტორის გავლენა არის მინიმალური. ტურიზმის ეროვნული ადმინისტრაციის მონაცემებით, საქართველოში განხორციელებული ვიზიტების 96% (1 332 188 ) მოდის 15 ქვეყანასთან. აღნიშნული 15 ქვეყნიდან 14-თან საქართველოს უვიზო რეჟიმი გააჩნია, ანუ მათ მოქალაქეებს საქართველოში შემოსვლის კუთხით შეფერხება არ შექმნიათ”, – აცხადებს გულბანი. რაც შეეხება საგარეო ვაჭრობას, მისი თქმით, ექსპორტის კლება გასული წლის ზაფხულის ბოლოდან შეინიშნება, თუმცა გასულ წელს და მიმდინარე წლის პირველ კვარტალში დაფიქსირებული ექსპორტის კლება იმით განსხვავდება, რომ გასულ წელს ექსპორტის კლება დაფიქსირდა რეექსპორტის კლების გამო, წელს კი ამ ფაქტორს დაემატა მძიმე ეკონომიკური ვითარება დსთ-ს ბაზრებზე, რომელსაც საქართველოს საექსპორტო ბაზრის საკმაოდ დიდი ნაწილი უჭირავს. “დსთ-ს ბაზრებზე ჩავარდნა და ევროკავშირთან გაფორმებული თავისუფალი ვაჭრობის ხელშეკრულება მნიშვნელოვნად აისახა სავაჭრო ტენდენციებზე. კერძოდ, ექსპორტი 2015 წლის პირველ კვარტალში გაზრდილია ევროკავშირში, დსთ-ს ქვეყნებში კი მნიშვნელოვანი კლებაა. თუ გასული წლის პირველ კვარტალში ევროკავშირში საქართველოს ექსპორტი შეადგენდა 140 მილიონ დოლარს, წელს ეს მაჩვენებელი 170 მილიონი დოლარია, ანუ 21%-ით მეტი. რაც შეეხება დსთ-ს ქვეყნებს, ამ მიმართულებით საქართველოს ექსპორტი 55%-ით შემცირდა და შარშანდელი 318 მილიონი დოლარის ნაცვლად 175 მილიონი დოლარი შეადგინა”, – აცხადებს გულბანი. მისივე თქმით, 2015 წლის პირველ კვარტალში საქართველოს მთლიანი შიდა პროდუქტის რეალური ზრდის ტემპმა 3,2% შეადგინა. ჯერ კიდევ მოქმედი, მთავრობის ეკონომიკური ზრდის პროგნოზი 5%-ს შეადგენს. “ზრდის იმავე ტემპს პროგნოზირებდა საერთაშორისო სავალუტო ფონდიც, თუმცა განვითარებული შოკების გამო პროგნოზი გადაიხედა და მნიშვნელოვნად, 2%-მდე შემცირდა. სავალუტო ფონდის ანგარიშის მიხედვით, რუსეთის კრიზისის ნეგატიური გავლენა ყველაზე მეტად სომხეთზე, ბელორუსსა და საქართველოზე იქნება. რის შედეგადაც, სომხეთსა და ბელარუსში ეკონომიკურ ვარდნას ელოდებიან, ხოლო საქართველოში ზრდის ტემპი შენელდება, თუმცა ზრდა იქნება”, – აცხადებს გულბანი. პრეზენტაციაზე ასევე სამომხმარებლო ფასების დონე, ფულადი გზავნილები და ლარის კურსი განიხილეს. კვლევის სრული ვერსიის ნახვა შესაძლებელია ვებგვერდზე – www.afba.ge
