2015 წლის 22 დეკემბრის სინოდის სხდომაზე საქართველოს საპატრიარქოს განათლების ცენტრის თავმჯდომარემ რუსთველმა მიტროპოლიტმა იოანემ (გამრეკელი) წარმოადგინა წლიური ანგარიში საქართველოს საპატრიარქოს სკოლების 2014-2015 სასწავლო წლის შედეგების შესახებ, სადაც ნათქვამია:
- სკოლა ოქროს მედალზე დაამთავრა 30-მა მოსწავლემ,
- ვერცხლის მედალზე 35-მა,
- მაღალი შეფასებით (9,5) ატესტატი გაიცა 63 ახალგაზრდაზე,
- კურსდამთავრებულთა 84% გახდა უმაღლესი სასწავლებელის სტუდენტი.
მიტროპოლიტმა იოანემ ასევე ისაუბრა საქართველოს საპატრიარქოს განათლების ცენტრის 2015 წლის საქმიანობის თაობაზე.
სინოდის სხდომის ოქმში აღნიშნულია, რომ ახალი საგნის – „მე და საზოგადოების“ პროექტი შეიცავს სერიოზულ ხარვეზებს, ამიტომ აუცილებელია მისი საჯარო განხილვა, რათა გათვალისწინებული იყოს საზოგადოების და სხვა ტრადიციული რელიგიური ჯგუფების აზრიც.
ცნობისთვის: “მე და საზოგადოების” და “ჩვენი საქართველოს” სკოლებში საგნად შესაძლო სწავლებას საზოგადოების ერთი ნაწილი აპროტესტებდა. ამასთან დაკავშირებით ნოემბრის ბოლოს მრევლისა და სასულიერო პირების ნაწილმა განათლების სამინისტროსთან აქციაც მოაწყვეს. ისინი აცხადებდნენ, რომ განათლების სამინისტროს ვებგვერდზე პედაგოგთათვის ამ საგნების სწავლების სახელმძღვანელო მასალებია ატვირთული. განათლების სამინისტრო მაშინ აცხადებდა, რომ “მე და საზოგადოებისა” და “ჩვენი საქართველოს”სახელმძღვანელოები დაბეჭდილი არ არის.
სოფიკო ნინიკაშვილი
