რა დატვირთვა აქვს კაშხლოვან ჰესებს და რამდენად საჭირო და მნიშვნელოვანია ისინი ჩვენი ქვეყნისთვის? რა შესაძლებლობა აქვს საქართველოს საკუთარი რესურსის გამოსამუშავებლად? ჰიდრორესურსის რა წილია ათვისებული? –  ეს საკითხი საქართველოს რეალობის უმნიშვნელოვანესი გამოწვევაა.

ხშირად ისმის სიახლეები იმის შესახებ, რომ მოსახლეობა საკუთარ საცხოვრებელ გარემოსთან ახლოს ჰესების შენების წინააღმდეგია. როგორც წესი, ამის მთავარ მიზეზად გარემოს დაბინძურება სახელდება ხოლმე. საკითხის ირგვლივ „თბილისი თაიმსს“ ენერგეტიკის ექსპერტი, დავით მირცხულავა ესაუბრა.

რა მნიშვნელობისაა საქართველოსთვის კაშხლოვანი ჰესების მშენებლობის გააქტიურება?

ამ ეტაპზე, კაშხლოვანი ჰესების გააქტიურებას ვერ ვხედავ იმიტომ, რომ, ჯერჯერობით, მხოლოდ ნენსკრა ჰესი შენდება კაშხლით. თუმცა, პერსპექტივაშია ნამახვანი. სხვა კაშხლოვანი ჰესის პროექტი, ამ ეტაპზე, საქართველოში არ არის. მაგრამ ეს პრინციპულად საჭიროა იმიტომ, რომ, ჯერ ერთი, გვაძლევს გარკვეულ რეზერვს და გვაძლევს ზამთრის ენერგიას – იძლევა დარეგულირების საშუალებას.

გარდა ამისა, მკითხველისთვის საინტერესო უნდა იყოს – ჩვენ რომ მზისა და ქარის სადგურები განვავითაროთ, მათ აუცილებლად დასჭირდებათ სარეზერვო სიმძლავრე და ამ სიმძლავრით მხოლოდ მაღალმანევრული სადგურებია – ეს სადგურები წყლის რეზერვუარებს ითვალისწინებს.

ეკოლოგიური თვალსაზრისით, რამდენად სუფთაა ჰესებზე გამომუშავებული ენერგია?

გარემოსდაცვით პრობლემებს უნდა მივაქციოთ უზარმაზარი ყურადღება. საჭიროა ნებისმიერი ასეთი პრობლემის მინიმიზაცია. შესაბამისი მოცემულობები გვხვდება მთელს მსოფლიოში – დასავლეთ ევროპაში, იაპონიაში მიმდინარე მშენებლობები.

რუკას რომ გადავხედოთ, ბევრი ჰიდროჰესია აშენებული ევროპაში და არამხოლოდ, დღესაც ბევრი შენდება. ეს არის ჩვენი ქვეყნის ძირითადი რესურსი, სხვა სტრატეგიული რესურსი საქართველოს არ გააჩნია. გარემოსდაცვითი ყველა მოთხოვნის დაკმაყოფილებით, ჩვენ ის უნდა ავითვისოთ. მსოფლიოში ვერ ნახავთ ვერც განვითარებულ და ვერც განვითარებად ქვეყანას, რომელსაც აქვს პოტენციალი – ჰიდროპოტენციალის გარკვეული მოცულობა – და მას არ ითვისებდეს.

ავტორი: მარიამ ტიელიძე

Please follow and like us: