ქართველი წარმატებული სტუდენტები მსოფლიოს მაღალრეიტუნგულ უნივერსიტეტებში

სტუდენტობა ცხოვრების მრავალფეროვანი და მნიშვნელოვანი ეტაპია. როგორც ზოგადი პრაქტიკა აჩვენებს, სასკოლო სივრციდან უფრო ფართო, საუნივერსიტეტო განზომილებაში, ადამიანები მეტ თავისუფლებას შეიგრძნობენ და ცდილობენ, რომ საკუთარი ადგილი იპოვონ მრავალ საინტერესო პროფესიათა შორის. ბაკალავრიატის დასრულების შემდეგ, სტუდენტთა ნაწილი სწავლას საზღვარგარეთ აგრძელებს. „თბილისი თაიმსი“ დაინტერესდა, თუ რა განაპირობებს მათს არჩევანს, როგორია იმ სტუდენტების სამომავლო გეგმები, რომლებიც უცხოეთში სწავლობენ, რა პრივილეგიებს ანიჭებს მათ უნივერსიტეტები და როგორ გააგრძელებენ საქმიანობას სამშობლოში დაბრუნების შემდეგ. უცხოეთში სწავლამდე განვლილი გზისა და სამომავლო პერსპექტივის შესახებ თავად სტუდენტები ისაუბრებენ.

მარიამ ზიბზიბაძე:

„ვსწავლობ, კურვინუსის უნივერსიტეტში, ბუდაპეშტში, საერთაშორისო ურთიერთობების სამაგისტრო პროგრამაზე. უნგრეთის სახელმწიფო Stipendium Hungaricum-ის პროგრამის ფარგლებში უმაღლესი სასწავლებლების სამივე საფეხურზე საშუალებას აძლევს უცხოელ სტუდენტებს, სწავლა უნგრეთის უნივერსიტეტებში გააგრძელონ. ამ სასტიპენდიო პროგრამის ფარგლებში უნგრული ტემპუსის ფონდი ლოკალურ ორგანიზაციასთან თანამშრომლობს, საქართველოს შემთხვევაში ეს არის საერთაშორისო განათლების ცენტრი. კონკურსის ფარგლებში აპლიკანტი სამ შესარჩევ ტურს გადის, ამ ეტაპების წარმატებით გავლის შემდგომ ხდება უნგრეთის სახელმწიფო სტიპენდიის სტიპენდიანტი და შესაძლებლობა ეძლევა, უნგრულ უნივერსიტეში გააგრძელოს სწავლა.

კორვინუსის უნივესრსიტეტი 1853 წელს დაარსდა და ბოლო წლების რეორგანიზაციის შემდეგ, 3 ფაკულტეტი ფუნქციონირებს: ეკონომიკის სკოლა, ბიზნესის სკოლა და სოციალური მეცნიერებისა და საერთაშორისო ურთიერთობების სკოლა. QS World University Rankings-ის მონაცემებით, უნივიერსიტეტი მსოფლიო რეიტინგის 600 საუკეთესო უნივერსიტეტშია შესული.

სწავლის დასრულების შემდეგ საქართველოში მინდა გავაგრძელო ცხოვრება და მუშაობა, ამჟამად დაინტერესებული ვარ აღმოსავლეთ ევროპის ქვეყნებისა და რუსეთის საგარეო პოლიტიკის ანალიზით. ვფიქრობ, სწორედ ამ მიმართულებით ვიმუშავებ საერთაშორისო ან ადგილობრივ ანალიტიკურ ორგანიზაციაში.“

სალომე ქირია:

„ვსწავლობ ჩინეთში, კანსუს პროვინციაში, ლანჭოუს უნივერსიტეტში; მანამდე ვსწავლობდი თავისუფალ უნივერსიტეტში, ბიზნესის ადმინისტრირებაზე, მეორად საგნად ავირჩიე ჩინური ენა, რადგან ბავშვობიდანვე ძალიან მომწონდა ჩინეთის შორეული აზიური კულტურა და ჩინელების განსხვავებულობა, უნივერსიტეტში მომეცა შესაძლებლობა, ახლოს გამეცნო ჩინეთი და მესწავლა ჩინური ენა, ეს მეორ მხრივ იქნებოდა ჩემს მომავალ განვითარებაში ჩადებული მნიშვნელოვანი ინვესტიცია.

ჩინური ენის სწავლა დავიწყე კონფუცის ინსტიტუტში; 2 წლის შემდეგ კი მივიღე მონაწილეობა კონფუცის ინსტიტუტის გაცვლით პროგრამაში, რომელიც ჩინეთის წამყვან ინსტიტუტებში ჩინური ენისა და კულტურის სწავლის გაგრძელებას აფინანებდა. ჩინეთში წასასვლელად მაღალ ქულებზე უნდა გქონოდა ჩაბარებული ჩინური ენის საერთაშორისო დონის წერითი (HშK III) და ზეპირი (HშKK), ორივე გამოცდა წარმატებით ჩავაბარე და კონფუცის ინსტიტუტის სტიპენდიაც მოვიპოვე ლანჟოუს უნივერსიტეტში სასწავლებლად.

უნივერსიტეტი ჩინეთში ცნობილია ფიზიკის, ქიმიის, ბიოლოგიისა და საბუნებისმეტყველო მეცნიერებების ფაკულტეტებით. ჩინეთის მასშტაბით ათეულში შედის. გამოირჩევა როფორც ერთ ერთი ძველი უნივერსიტეტი. სწავლის დასაწყისში უცხოელი სტუდენტებისთვის გაცნობითი დღეების ფარგლებში უამრავ საინტერესო ღონისძიებას დავესწარი ჩინური კულტურისა და ტრადიციების გასაცნობად: თავადა ვიღებდით მონაწილეობას ჩაის დამზადების ცერემონიაში, ჩინური ტრადიციული საჭმელის – პაოწ-ების მომზადებაში, მონაწილეობა მივიღე ტრადიციულ ცეკვებში.

ერთი წლის შემდეგ საქართველოში დავბრუნდები, თუმცა ჯერ ზუსტად არ გადამიწყვიტავს რა მიმართულებით გავაგრძელებ საქმიანობას.“

ნიკა შეყელაძე:

„ვსწავლობ სეგედის უნივერსიტეტში, უნგრეთში საერთაშოეისო ურთიერთობების მაგისტრატურის პროგრამაზე. აღნიშნულ უნივერსიტეტში სწავლის გაგრძელება უნგრეთის მთავრობის სტიპენდიების მეშვეობით შევძელი, რომელსაც საქართველოში განათლების საერთაშორისო ცენტრი ხელმძღვანელობს. რაც შეეხება შესარჩევ ეტაპს, იგი რამდენიმე ეტაპად მიმდინარეობდა. უპირველესყოვლისა შეგვარჩიეს დოკუმენტების საფუძველზე, შემდგომ იყო გასაუბრება და კანდიდატთა წარდგენა მასპინძელ უნივერსიტეტებში. ჩემი პირველი პრიორიტეტი სწორედ სეგედის უნივერსიტეტი იყო და შერჩევის მიხედვითაც აქ მოვხვდი.

სეგედის უნივერსიტეტი უნგრეთში ერთ-ერთი პირველია. უნივერსიტეტების სხვადასხვა რეიტინგების მიხედვით იგი უნგრეთის სამეულშია, ხოლო მსოფლიო მასშტაბით 500-600 ადგილებს შორისაა. აქ შესაძლებელია სხვადასხვა ინგლისურ პროგრამაზე სწავლა როგორც ბაკალავრიატის, ისე მაგისტრატურისა და დოქტორანტურის საფეხურებზე გაგრძელება.

სწავლის დასრულებისთანავე საქართველოში დაბრუნებას არ ვგეგმავ. მსურს, დავაგროვო გარკვეული სამუშაო გამოცდილება სხვადასხვა ორგანიზაციებში მუშაობით და შემდგომ დავბუნდე სამშობლოში.“

რუსუდან ზაბახიძე:

„ერასმუს მუნდუსის ერთობლივი სამაგისტრო პროგრამის ფარგლებში ვსწავლობ გლაზგოს უნივერსიტეტში, გაერთიანებულ სამეფოში უსაფრთხოების, დაზვერვისა და სტრატეგიული კვლევების საერთაშორისო პროგრამაზე, რომელიც ერთობლივად რამდენიმე აკადემიურ პარტნიორს შორის თანამშრომლობით ხორციელდება. ამის გამო ერთი სემესტრის განმავლობაში თითოეულ პარტნიორ უნივერსიტეტში სწავლის შესაძლებლობა მომეცემა. მომდევნო გაზაფხულის სემესტრი დუბლინ სითის(ირლანდია), ხოლო შემოდგომის სემესტრი ჩარლზის (ჩეხეთი) უნივერსიტეტში სწავლას გულისხმობს. გარდა ამისა პროგრამა მოიცავს საზაფხულო კურს გერმანიაში, როზენსბურგის ტექნიკურ უნივერსიტეტში და სასწავლო პრაქტიკას პარტნიორ ორგანიზაციაში.

როგორც აღვნიშნე, სამ უნივერსიტეტში ვისწავლი. თითოეული მათგანი ერთმანეთისგან განსხვავებულია სასწავლო მეთოდების, შემოვაზებული შესაძლებლობების მიხედვით, თუმცა სამივეს აქვს საკუთარი ძლიერი მხარე, რომლითაც პროგრამას ამრავალფეროვნებს და მის წარმატებაში შეაქვს წვლილი. გლაზგოს უნივერსიტეტი მსოფლიოს უნივერსიტეტების საუკეთესო ასეულში შედის, შესაბამისად, აქ მოხვედრისათვის თითოეული სტუდენტი საკმაოდ მაღალი კონკურსის პირობებში იბრძვის. დუბლინ სითის უნივერსიტეტი შედარებით ახალი უნივერსიტეტია, თუმცა მცირე დროში შეძლო დაწინაურება. ჩარლზის უნივერსიტეტი კი ერთ-ერთი უძველესი უნივერსიტეტია და ასევე წარმატებით მიიწევს წინ მსოფლიო უნივერსიტეტების რეიტინგში. ჩემს პროგრამაზე წელს 40 სტუდენტი ჩაირიცხა მსოფლიოს 28 ქვეყნიდან, მათ შორის 2 საქართველოდან. პროგრამის ფარგლებში სასწავლო გარემოს მუდმივი ცვლა საშუალებას გვაძლევს მრავალფეროვან აკადემიურ მიდგომებს გავეცნოთ და მის პარალელურად პრაქტიკული გამოცდილებაც მივიღოთ.

პროგრამა 4 სასწავლო მოდულს მოიცავს, რომელთაგან ერთზე არჩევანი სწავლების მეორე წელს თავად სტუდენტმა უნდა გააკეთოს. ვინაიდან სწავლა ახლახან დავიწყე, გადაწყვეტილება ჯერ არ მიმიღია კონკრეტულად რომელი მიმართულებით დავავიწროვებ ჩემს ინტერესს. დიდი ალბათობით, სწორედ ეს არჩევანი გადაწყვეტს ჩემს სამომავლო საქმიანობას.

ყოველთვის აღვნიშნავ, რომ საქართველოსთვის მუშაობა ყველაზე დიდ სიამოვნებას მანიჭებს-მნიშვნელობა არ აქვს ეს საზღვარგარეთიდან ხდება თუ ქვეყნის შიგნიდან, ამიტომ რა საქმიანობაც არ უნდა ავირჩიო, ყოველთვის ვეცდები ის როგორმე საქართველოს განვითარებას დავუკავშირო.“

ნანუკა მაღლაკელიძე